Hörmətli sərnişinlər,

2023-cü il “BakuBus” MMC-nin fəaliyyətində əhəmiyyətli müsbət dəyişikliklərlə yadda qalmışdır. Bu dəyişikliklər, fəaliyyətimizin əsas statistik göstəricilərində də öz əksini tapmışdır. Belə ki, 2023-cü ildə “BakuBus” MMC 123,539,024 milyon sərnişin daşımasını həyata keçirmişdir. Bu da ötən illə müqayisədə 15.3% artım deməkdir. Bundan əlavə, 2023-cü ildə “BakuBus”  MMC-nin istismarına 9 yeni marşrut xətti (189, 172, 163, 149, 139, 57, 44, 4 və 108A) verilmişdir. Bu da  paytaxtımızın ictimai nəqliyyatında mövcud 112 avtobusun yenilənməsi və müasir standartlara cavab verən avtobuslarla əvəz olunması deməkdir.

Sərnişindaşıma xidmətinin  əhatə dairəsinin genişlənməsilə yanaşı, fəaliyyətimizin prioriteti olan sərnişin məmnuniyyəti ötən il də diqqət mərkəzimizdə olmuşdur. Belə ki, xidmət keyfiyyətini fəaliyyət standartına çevirən “BakuBus” MMC, ötən il  bu istiqamətdə yeni institusional addım atmış, keyfiyyətə nəzarət mütəxəssisləri sistemi yaradılmışdır.  Bu mütəxəssislər, gündəlik əsasda bilavasitə xidmət zamanı keyfiyyətin monitorinqini həyata keçirir və sərnişinlərin rəyini öyrənirlər.

Bununla yanaşı, onlayn dispetçer sistemi  təkmilləşdirilmiş və  avtobusların marşrut xətləri üzrə idarə olunmasının səmərəliliyi artırılmışdır.

Eyni zamanda, 2023-cü il ərzində 6021 vətandaş müraciəti daxil olmuşdur. Bu da ötən illə müqayisədə 17,4% artım deməkdir. Bütün vətandaş müraciətlərinin operativ cavablandırılması təmin edilmişdir.